المشهد الاول
(فى منزل لفيق)
لفيق: ادعيلى يا أما دعوتين حلوين عشان هاشتغل فى السيما.
الام: يجعلك نجم شباك والناس كلها عيزاك .. ولا يضايقك حد من الجمهور ولا ممثل مغمور .. ويرزقك بمنتج متريش ويدفعلك من جيبه ويكيش.
المشهد الثانى
(فى موقع التصوير)
المخرج: عارف دورك يا لفيق ؟ .. اول ما الحرمية يضربو البطل ويقول الحقونى هتخش انت تسأله الساعة كام.
لفيق: وهو بينضرب هسأله الساعة كام؟
المخرج: تمام .. هايرد عليك ويقولك الساعة واحدة وماشية غلط .. يلا جاهزين يا جماعة .. ستاند باى .. هنصور .. ثري .. تو .. وان.
رجل الكلاكيت: فلم جريمة فى سبت الغسيل اول مرة.
حرامي 1: طلع اللى فى جيبك من سكات دل ما اقطعك ابرع تربع .
البطل: تقطع مين اربع تربعيا عم انت بتكلم برتقانة.
حرامي2: معاك موبايل ياله؟
البطل: لا مابشيلش موبايلات.
(صوت رنة موبايل)
حرامى 3: اومال ايه اللى بيرن ده؟
البطل: دا جرس الباب ... اصلي مركب واحد فى جيبي.
حرامي 1: دا طلع دمه خفيف يا رجالة .. اضربوه.
(صوت تلطيش)
البطل: الحقونى .. الحقونى .. الحقونى .
المخرج: استوب .. مادخلتش ليه يا لفيق؟
لفيق: معلش يا استاذ كنت بربط الجزمة .
المخرج: يلا تانى .. ثري .. تو .. وان.
رجل الكلاكيت: فلم جريمة فى سبت الغسيل تانى مرة.
(فى منزل لفيق )
الام: ربنا يفك ربطت لسانك فى اللوكيشن يا لفيق يابني .. انا حلمت بيه النهارده وهو ماشي على اسفلت احمر.
الاب: الواد ابنك هايعدى يا زينب .. الاسفلت الاحمر ده استعارة متنيةمقصود بيها السجادة الحمرا .. أبشري يا وليه ابنك هيخش مهرجان كان.
المشهد الثالث
(فى موقع التصوير)
المخرج(فى عصبية): ستووب .. حد يغير لى البني ادم ده بسرعة .
لفيق: مالك بس يا سطى فى ايه؟
المخرج: انت غبي .. مابتفهش .. بقالنا اربعتاشر مرة بنعيد علشانك.
لفيق: معلش اصل دى اول بطولة مطلقة ليا وعايز استغلها.
المخرج: بطولة ايه يابني .. انت مش هاتقول غير كلمتين .. خد بالك لو فشلت المرة دى هاخليهم يطوحوك بره الاستوديو.
رجل الكلاكيت: فيلم جريمة فى سبت الغسيل ستاشر مرة .. انا اتخنقت.
المخرج: أكشن.
حرامي 2: معاك موبايل ياله؟
البطل: مابشيلشموبايلات واللى هايرن فى جيبي دلوقتى دا جرس الباب ويلا بقي اضربونى علشان انا زهقت.
حرامي 1: دا طلع دمه خفيف يا رجالة .. اضربوه.
(صوت تلطيش)
البطل: الحقونى .. الحقونى .. الحقونى .
لفيق(للمخرج بصوت عالى): أدخل بقي يا استاذ؟
المخرج(فى غضب): ستوووب .. طلعوا الكلب دا بره.
قطع...